卡塔尔世界杯开幕个搿日天，感谢我个宝贝囡儿，新买个大屏幕电视机到了，挂勒墙壁浪，简直是辽阔呀。上一届世界杯，我买了只小个电视机摆勒电脑屏幕个旁边。其实，除脱仔看世界杯，我老里八早就勿看电视了。
勿记得是阿里一年开始看足球个，反正跟电视相关。最早个黑白电视机，足球滚到阿里搭是老难一眼发现个。除脱马拉多纳个“上帝之手”，看过个场面几乎侪忘记脱了，记牢个是一些球星个名字，贝肯鲍尔、济科、齐达内啥个。前日仔看到采访罗纳尔多个视频，介潇洒个帅哥竟然成为了一只胖子。埃个辰光，伊剃只“罗纳尔多头”上场，风靡一时，我儿子也剃过头顶一块瓦片个发型。成为胖子还算勿错，天才个马拉多纳已经没了。几天前头个一张新闻图片，巴西个球迷侪勒圣保罗医院外头为球王贝利守夜，祈祷迭位82岁个偶像平安。
半夜里，我一家头坐勒客厅个沙发浪，面前有咖啡、有香烟酒搭仔水果，还有巧克力。交关辰光呒没看球了，发现多了眼新花头。比方，对付定位球，勒人墙后头横了一个卧佛。比方，勒禁区，球员背仔个手防守，常怕拨吹了点球。又比方，裁判个权威大打折扣了，时勿时要去看视频回放，连搿只皮球也升级了，据说还要充电，内置芯片。下一届世界杯是否就勿要场浪向个主裁、边裁了，让AI来裁判可能更加及时搭仔公正。
电视机里个球场邪气喧闹，观众一惊一乍个为伊拉个主队加油。而我是个呒没主队个人，一个世界杯个流浪汉。用鲁迅个说法，是伊种“丧家个”动物。看球需要有个立场，我勿买足彩，支持啥个队成为了麻烦个问题。巴西是一定要力挺个，阿根廷有过马拉多纳、也是我欢喜个。另外，有辰光是爱屋及乌，欢喜梅西搭C罗，顺带便欢喜伊拉个球队了。有辰光觉着身在东亚，日本搭仔韩国侪是黄种邻居，勿妨支持一下。我曾经到过法国、英国、澳大利亚、荷兰，印象也邪气勿错个，必须支持。更加多个球赛呒没说法，就随便挑个队当主队伐。作为一个流浪汉，真个是老有平常心个，勿至于大喜大悲。无论是啥人输、啥人赢，绝勿痛心疾首，绝勿大喜过望。
现在个心态，比往年更加宽容了，勿去指责任何球员搭仔教练。勒疫情面前，球赛并勿是天经地义个，有得踢、有得看，就邪气勿错了。感谢东道主个大手笔，我只须要糊里糊涂个一场一场看下去，心怀杂念，勒吃咖啡个辰光送走德国，吃香蕉个辰光送走西班牙，一夜之间东亚绝了种。伊拉回转去以后，伊拉个球迷搭我一样，也只好流浪了，勿晓得支持阿里一个好。跟我勿一样个是，伊拉有得懊恼，有得勿甘心，有得对四年以后个期待。而我个悬念只是，勿晓得四年以后是勿是再去调只电视机。
期待卡塔尔世界杯圆满成功。我最后个心愿是祝贝利平安康健。